काँग्रेस आमदार नसीम खान यांच्यावर पैशाची उधळण

मुंबई-काँग्रेसचे आमदार नसीम खान यांच्यावर दोन जण पैशांची उधळण करत असल्याचा एक व्हिडिओ सोशल मीडियावर व्हायरल झाला आहे. एका गणेशोत्सवात नसीम खान यांच्यावर हा पैशांचा पाऊस पाडण्यात आला आहे. घटनेचा व्हिडिओ व्हायरल होताच नसीम खान यांच्यावर टीका देखील होत आहे.

आमदार नसीम खान यांचा एक व्हिडिओ सोशल मीडियावर व्हायरल झाला आहे. नसीम खान हे एका गणेशोत्सवात गेले होते. या गणेशोत्सवात नसीम खान यांच्यावर दोन जणांनी पैशांचा पाऊस पाडला. पैशांची उधळण करतानाच हा व्हिडिओ सोशल मीडियावर चर्चेचा विषय ठरला. गणेशोत्सवात असा प्रकार घडल्याने अनेकांनी नाराजी व्यक्त केली आहे.

याबाबत आमदार नसीम खान यांनी प्रतिक्रिया देतांना ‘भानुशाली समाजाच्या गणेशोत्सवाला मी गेलो होतो. तिथे मंडपात दोन जण माझ्यावर पैशांची उधळण करु लागले. मी काही वेळेसाठीच तिथे गेलो होतो. मी त्यांना रोखण्याचाही प्रयत्न केला. पण त्यांच्या परंपरेत अडथळा आणणे मला योग्य वाटले नाही. मी असे काही केले असते तर वाद निर्माण झाला असता. पैसे मी उडवलेले नाहीत. माझ्या हातून कोणतेही चुकीचे काम झालेले नाही’, असे सांगत त्यांनी दिलगिरी व्यक्त करण्यास नकार दिला. तर भाजपा, शिवसेना या पक्षाच्या नेत्यांनी नसीम खान यांनी माफी मागावी तसेच त्यांच्यावर बहिष्कारच टाकला पाहिजे, अशी मागणी केली आहे. मी पेट्रोल व डिझेलसंदर्भात केलेल्या मागणीची बातमी दाखवता येत नाही. पण असे विनाकारण वाद निर्माण केले जातात, असे सांगत त्यांनी माध्यमांवरही आगपाखड केली.