पश्चिम बंगालमध्ये पुन्हा एका भाजप कार्यकर्त्याची हत्या !

कोलकाता: लोकसभा निवडणुकीदरम्यान पश्चिम बंगालमधील भाजप आणि तृणमूल कॉंग्रेसमध्ये प्रचंड तणाव दिसून आले. दरम्यान पश्चिम बंगालमध्ये आणखी एका भाजप कार्यकर्त्याची गोळ्या झाडून हत्या करण्यात आली. लोकसभा निवडणुकीच्या निकालानंतर पश्चिम बंगाल आणि उत्तर प्रदेशातील अमेठीत भाजप कार्यकर्त्यांच्या हत्या झाल्यानंतर देशभरात झालेली ही तिसरी हत्या आहे. ही घटना काल २४ परगना जिल्ह्यात घडली. दोनच दिवसांपूर्वी चकदहा येथे एका भाजप कार्यकर्त्यांची गोळ्या झाडून हत्या करण्यात आली. दरम्यान, या घटनेला तृणमूल काँग्रेस जबाबदार असल्याचे भाजपचा आरोप आहे, तर प्राथमिक तपासात या हत्येमागे कोणताही राजकीय हेतू दिसला नसल्याचे पोलिसांनी स्पष्ट केले आहे. चंदन शॉ असे हत्या झालेल्या कार्यकर्त्याचे नाव आहे.

शॉ यांच्यावर अज्ञातांकडून रविवारी रात्री गोळ्या झाडण्यात आल्या. या घटनेनंतर परिसरात सुरक्षा दलाचे जवान तैनात करण्यात आले आहेत. गेल्या तीन दिवसांमध्ये ही दुसरी हत्या झाल्याने पश्चिम बंगालमध्ये तणाव निर्माण झाला आहे. या पूर्वी नादियामधील चकदहा येथे शांतू घोष या कार्यकर्त्याची हत्या झाली होती. या प्रकरणात पोलिसांनी २५ वर्षीय भारत बिश्वास उर्फ पोचन याला शनिवारी ताब्यात घेतले आहे. हत्या झाली तेव्हा आपण घटनास्थळी उपस्थित होतो, मात्र आपले लक्ष मोबाइलमध्ये असल्याचे बिश्वास यांनी न्यायालयात जात असताना पत्रकारांना सांगितले. लाल्टू नावाच्या व्यक्तीने शांतू यांच्यावर गोळ्या झाडल्या, त्यानंतर आपण तेथून पळून गेलो असे बिश्वास याने सांगितले.