चंद्रशेखर बावनकुळेंच्या पत्नींचा अपक्ष अर्ज दाखल

कामठी: भाजपने विधानसभेसाठी दिग्गज नेत्यांना उमेदवारी दिली नाही. यात माजी मंत्री एकनाथराव खडसे, विनोद तावडे, प्रकाश मेहता, चंद्रशेखर बावनकुळे यांचा पत्ता कट झाला आहे. दरम्यान पक्षाने शेवटच्या क्षणापर्यंत ताटकळ ठेवले असल्याने चंद्रशेखर बावनकुळे यांच्या पत्नी ज्योती बावनकुळे यांनी अपक्ष अर्ज दाखल केला आहे.

भाजपने सर्व मतदारसंघातील उमेदवारांच्या नावाची घोषणा केल्यानंतरही भाजपाने नागपूरमधील कामठी मतदारसंघातील उमेदवारीचा निर्णय बराच ताणून धरला आहे.

ऐनवेळी खडसे यांच्याऐवजी त्यांची कन्या रोहिणी खडसे यांना उमेदवारी देण्यात आली. त्यामुळे बावनकुळे यांच्या पत्नीला उमेदवारी देण्यात येणार असल्याची चर्चा सुरू झाली. मात्र, त्याबाबतही लवकर निर्णय होत नसल्याने चंद्रशेखर बावनकुळे यांच्या पत्नी ज्योती बावनकुळे यांनी शुक्रवारी दुपारी उमेदवारी अर्ज दाखल केला. त्यांनी अपक्ष म्हणून अर्ज भरला आहे. ज्योती बावनकुळे यांचा अर्ज दाखल झाला असली, तरी कामठी मतदारसंघातून भाजपाचा उमेदवार कोण असेल हे अजूनही गुलदस्त्यात आहे.