विप्रोचे अध्यक्ष अझीम प्रेमजी आज होणार निवृत्त !

नवी दिल्लीः भारतातले दुसरे सर्वात श्रीमंत व्यक्ती असलेले विप्रोचे अध्यक्ष अझीम प्रेमजी आज निवृत्त होत आहेत. त्यांचा मुलगा रिषद प्रेमजी आता कंपनीची धुरा सांभाळणार आहे. अझीम प्रेमजी यांचा जन्म मुंबईतल्या एका गुजराती मुस्लिम कुटुंबात 24 जुलै 1945मध्ये झाला. अझीम प्रेमजींचे कुटुंबीय मूळचे जळगाव जिल्ह्यातील अमळनेरचे आहेत. तिथे त्यांचे वडील मुहंमद हाशिम प्रेमजी यांनी वेस्टर्न इंडिया व्हेजिटेबल प्रॉडक्टस् या नावाने सनफ्लॉवर खाद्यतेलाचा कारखाना टाकला होता व 787 या नावाच्या कपडे धुण्याच्या साबणाचाही ते उद्योग करत होते.

साबण ते सॉफ्टवेअर किंग अशी ही अझीम प्रेमजींची यशोगाथा आहे. अझीम प्रेमजींचा विवाह यास्मीन यांच्याशी झाला असून, त्यांना रिषद व तारीक ही दोन मुले आहेत. रिषद सध्या विप्रोच्या माहिती-तंत्रज्ञान विभागात चीफ स्ट्रॅटेजी ऑफिसर म्हणून काम करतो. अझीम प्रेमजी यांच्या या कामगिरीसाठी त्यांना बिझनेस वीकने ग्रेटेस्ट एंटरप्रेन्युअर हा पुरस्कार दिला आहे, तर 2000 साली मणिपाल विद्यापीठाने त्यांना मानद डॉक्टरेट प्रदान केली. नॅशनल इन्स्टिट्यूट ऑफ इंडस्ट्रियल इंजिनीअरिंगने त्यांना लक्ष्य बिझनेस व्हिजनरी तर कनेक्टिकट विद्यापीठ व म्हैसूर विद्यापीठाने त्यांना मानद डॉक्टरेट दिल्या आहेत. भारत सरकारने त्यांना 2005मध्ये पद्मभूषण व 2011 मध्ये पद्मविभूषण पुरस्कारानं सन्मानित करण्यात आलं आहे.